ጋዜጠኛ እስክንድር ነጋ ያለበት ሁኔታ አሳሳቢ ነው ተባለ

ጋዜጠኛ እስክንድር ነጋ ያለበት ሁኔታ አሳሳቢ ነው ተባለ
የ18 ዓመት እስር ተበይኖበት ከ4 አመታት በፊት ወደ ቃሊቲ ማረሚያ ቤት የወረደው ጋዜጠኛ እስክንድር ነጋ አያያዝ አሳሳቢ መሆኑ እየተነገረ ነው፡፡
‹‹እስክንድር ነጋ መጽሐፍ ቅዱስን ጨምሮ ምንም አይነት መጽሐፍ እንዳያነብ ተከልክሏል፡፡ ከባለቤቱ ወ/ሮ ሰርካለም ፋሲል እናትና ከአንድ የቅርብ ዘመዱ ውጭ ማንም እንዳይጠይቀው ታግዷል፡፡ እስክንድር ከአንድ ሰፊ ግቢ ውስጥ ከአምስት ሰዎች ጋር ብቻ ነው የታሰረው፡፡ ማንም ጋር አይገናኝም፡፡ መቀመጫ ወንበሩ ተወስዶበት የቆሻሻና ውሃ ማጠራቀሚያ የነበረ ባልዲን ባፉ ደፍቶ ጨርቅ ደልድሎ ነው ለመቀመጫነት የሚጠቀመው›› ሲሉ ስማቸው እንዳይገለጽ የፈለጉ የእስክንድር ነጋ የቅርብ ሰው ለቀለም ቀንድ ጋዜጣ ተናግረዋል፡፡
የኢትዮጵያ ሕገ መንግሥት አንቀጽ 21 በጥበቃ ሥር ያሉና በፍርድ የታሰሩ ሰዎች ሰብኣዊ መብታቸው የመጠበቅ መብት እንዳላቸውና ከትዳር ጓደኞቻቸው፣ ከቅርብ ዘመዶቻቸው፣ ከጓደኞቻቸው፣ ከሀይማኖት አማካሪዎቻቸው፣ ከሀኪማቸው፣ ከህግ አማካሪዎቻቸው ጋር ለመገናኘትና እንዲጎበኟቸውም መብት እንዳላቸው ይደነግጋል፡፡
(የቀለም ቀንድ ጋዜጣ ቅጽ 3 ቁጥር 12)