የአላሙዲና የሌሎች ባለሃብቶች ድርጅቶችና ሆቴሎች በባህርዳር ሰራተኞችን እየቀነሱ ነው

ከአያሌው መንበር

ባህር ዳር ውስጥ ያሉ የግል ተቋማት በተለይም ሆቴሎች ሰራተኞቻቸውን እየቀነሱ ነው።ገቢ የለንም በሚል ምክንያት የእነ አላሙዲ ሪዞርትን ጨምሮ ሌሎች ስመጥር ሆቴሎች ሰሞኑን ብዙ ሰራተኞች ቀንሰዋል።

ይህ አማራውን ከስራ ውጭ በማድረግ ለዕለት እንኳን የሚበላው በማሳጣት ለህወሃት ተገዥ ይሆን ዘንድ የማጥቂያ መንገድም ነው። በርካታ የአማራ ወጣቶች በስራ አጥነት እየተሰቃዩ የቤተሰብ ሸክም በሆኑበትና አማራጭ አጥተው በህገ ወጥ መንገድ ለስደት እየተዳረጉ ባሉበት ጊዜ ታቅዶበት ቤተሰቦቻቸው ከሚያገኟት የእጅ ወደ አፍ ገቢ እንኳን ፈፅሞ ሲከለከሉ ምን ሊሆኑ እንደሚችሉ ማሰብ አንድ ሙሉ አዕምሮ ላለው ሰው ቀላል አይደለም።

በድሮው ስርዓት ከተገነባው የባህር ዳር ጨርቃ ጨርቅ ፋብሪካ ውጭ ሌላ ሰፊ የሰው ሀይል መሸከም የሚችል ኢንዱስትሪ የሌላት ባህር ዳር እና መላው አማራ ላለፉት ዓመታት የህወሃትን ባለስልጣናት ሆድና ኪስ የማድለቢያ ፋጉሎ ነው ሲያቀርብ የኖረው።ዛሬ ደግሞ ሀብት ንብረታቸው ሁሉ ወደ መቀሌ ሆኖ ሆቴል መገንባት ቀርቶ በሆቴሎችና ጥቃቅን ካፌዎች እንኳን ተቀጥረው እንዳይሰሩ ይኸው ገበያ የለም በሚል በርካቶች ከስራ እየተሰናበቱ ነው።